Kanpur Test: వర్షంతో.. 35 ఓవర్లకే ముగిసిన ఆట, బంగ్లాదేశ్ 107/3

బంగ్లాదేశ్‌తో కాన్పూర్ వేదికగా శుక్రవారం (సెప్టెంబర్ 27) ప్రారంభమైన రెండో టెస్టు తొలి రోజు ఆట ముగిసింది. తొలుత ఔట్ ఫీల్డ్ కారణంగా మ్యాచ్ ఆలస్యంగా ప్రారంభమైంది. ఆ తర్వాత కూడా వర్షం పడటంతో తొలి రోజు ఆట ముగిసినట్లు అంపైర్లు ప్రకటించారు. ఈ మ్యాచులో టాస్ ఓడి తొలి ఇన్నింగ్స్‌లో బ్యాటింగ్‌కు దిగిన బంగ్లాదేశ్.. 35 ఓవర్లలో 107/3 పరుగులు చేసింది. భారత బౌలర్లలో ఆకాశ్ దీప్ 2 వికెట్లు తీయగా.. రవిచంద్రన్ అశ్విన్ ఒక వికెట్ తీశాడు.

గురువారం రాత్రి కాన్పూర్‌లో భారీ వర్షం కురిసింది. దీంతో మైదానం చిత్తడిగా మారింది. ఫలితంగా మ్యాచ్ సుమారు గంట సేపు ఆలస్యంగా ప్రారంభమైంది. ఈ మ్యాచులో టాస్ గెలిచిన కెప్టెన్ రోహిత్ శర్మ.. బౌలింగ్ ఎంచుకున్నాడు. వాస్తవానికి కాన్పూర్ పిచ్ స్పిన్నర్లకు అనుకూలంగా ఉంటుందనే అంచనాలు ఉండేవి. దీంతో అక్షర్ పటేల్ లేదా కుల్‌దీప్ యాదవ్‌లలో ఒకరు తుది జట్టులోకి వస్తారని అంతా భావించారు. కానీ వర్షం కారణంగా పిచ్ పరిస్థితి మారిపోవడంతో యాజమాన్యం తుది జట్టులో మార్పులు చేయలేదు. దీంతో తొలి టెస్టుకు బరిలో దిగిన జట్టునే కాన్పూర్‌లోన బరిలోకి దించింది.

అటు బంగ్లాదేశ్ రెండు మార్పులు చేసింది. నహీద్ రాణా, టస్కిన్ అహ్మద్‌లను జట్టు నుంచి తప్పించింది. తైజుల్ ఇస్లాం, ఖలీద్‌ను జట్టులోకి తీసుకుంది. ఇక టాస్ ఓడి బ్యాటింగ్‌కు దిగిన బంగ్లాదేశ్ ఆచీతూచీ బ్యాటింగ్ చేసింది. ముఖ్యంగా బుమ్రా బౌలింగ్‌లో వికెట్ ఇవ్వకూడదని నిర్ణయించుకున్నారో, ఏమో.. ఆ జట్టు బ్యాటర్లు పట్టుదలతో బ్యాటింగ్ చేశారు.

సిరాజ్ కూడా వికెట్ల వేటలో విజయం సాధించలేకపోయాడు. ఇదే సమయంలో ఆకాశ్ దీప్ అదరగొట్టాడు. స్వల్ప వ్యవధిలోనే ఓపెనర్లు ఇద్దరినీ ఔట్ చేశాడు. జాకిర్ హసన్ (0), ఇస్లామ్ (24)ను పెవిలియన్ చేర్చాడు. దీంతో 29 పరుగులకే బంగ్లాదేశ్ రెండు వికెట్లు కోల్పోయింది.

ఈ దశలో బ్యాటింగ్‌కు వచ్చిన నజ్ముల్ హుసేన్ శాంటో, మొమినుల్ హక్‌తో కలిసి 50 పరుగుల భాగస్వామ్యాన్ని నమోదు చేశాడు. దీంతో బంగ్లాదేశ్.. 80/2తో కోలుకున్నట్లే కనిపించింది. తొలి టెస్టుల్లో ఆల్ రౌండ్ ప్రదర్శనతో అదరగొట్టిన అశ్విన్.. ఈ మ్యాచులోనూ తొలి రోజు ఆటలో ఓ వికెట్ తన ఖాతాలో వేసుకున్నాడు. శాంటో (31)ను పెవిలియన్ చేర్చాడు.

ఇక వర్షం కురిసి ఆట నిలిచిపోయే సమయానికి బంగ్లాదేశ్ 35 ఓవర్లలో 3 వికెట్ల నష్టానికి 107 పరుగులు చేసింది. క్రీజులో మొమినుల్ (40), ముష్పికర్ రహీమ్ (6) ఉన్నారు. తొలి రోజు ఆటలో 9 ఓవర్లు వేసిన బుమ్రా.. వికెట్ మాత్రం తీయలేకపోయాడు.