మోక్షజ్ఞ సినిమాకి సమస్య… ప్రశాంత్ వర్మ ఏం చేస్తాడో!

బాలకృష్ణ ఫ్యాన్స్ తో పాటు మొత్తం తెలుగు సినిమా పరిశ్రమ, తెలుగు ప్రేక్షకులు మోక్షజ్ఞ ఎంట్రీ మూవీ కోసం ఆసక్తిగా ఎదురు చూస్తున్నారు. చాలా కాలం తర్వాత పెద్ద ఫ్యామిలీ నుంచి హీరో ఎంట్రీ ఇవ్వబోతున్నాడు. అదీ స్టార్‌ హీరో బాలయ్య వారసుడు అవ్వడంతో అంచనాలు భారీగా ఉన్నాయి. అంచనాలకు తగ్గట్లుగా మోక్షజ్ఞ ని ఎవరు అయితే బాగా చూపిస్తారని బాలకృష్ణ దాదాపు రెండేళ్లుగా చర్చలు జరుపుతున్న సమయంలో ప్రశాంత్ వర్మ రూపంలో బెస్ట్‌ ఆప్షన్ దొరికింది. హనుమాన్‌ తో పాటు అంతకు ముందు ప్రశాంత్ వర్మ చేసిన సినిమాలు బాక్సాఫీస్ వద్ద మంచి విజయాన్ని సొంతం చేసుకోవడంతో పాటు విభిన్నమైన సినిమాల దర్శకుడిగా ఆయనకు పేరు దక్కింది. అందుకే ఏమాత్రం అనుమానం లేకుండా మోక్షూ ను ప్రశాంత్ వర్మ చేతిలో బాలయ్య పెట్టినట్లు టాక్‌ వినిపిస్తోంది.

హనుమాన్‌ సినిమాతో ప్రశాంత్‌ వర్మ ఒక్కసారిగా పాన్ ఇండియా స్టార్‌ డైరెక్టర్‌ గా పేరు దక్కించుకున్నాడు. ప్రస్తుతం జై హనుమాన్‌ సినిమాను చేస్తున్న దర్శకుడు ప్రశాంత్‌ వర్మ మరో వైపు అధీర సినిమాను చేస్తున్నాడు. మరో వైపు మోక్షజ్ఞ సినిమాను ప్రకటించాడు. మరీ ఆలస్యం చేయకుండా మోక్షజ్ఞ సినిమాను పట్టాలెక్కించేందుకు దర్శకుడు ప్రశాంత్‌ వర్మ ప్లాన్‌ చేస్తున్నాడు. ఇప్పటికే స్క్రిప్ట్‌ వర్క్ దాదాపుగా పూర్తి అయింది. మరో వైపు హీరోయిన్‌ ఎంపిక విషయమై చర్చలు జరుగుతున్నాయి. పాన్ ఇండియా మూవీగా ఈ సినిమాను రూపొందించబోతున్నారు కనుక నార్త్‌ బ్యూటీ అయితే బాగుంటుందని, అదీ కాకుండా గుర్తింపు ఉన్న హీరోయిన్‌ అయితే బెటర్‌ అనే అభిప్రాయంను చాలా మంది వ్యక్తం చేశారట. ప్రశాంత్‌ వర్మ మాత్రం ఇంకా ఏ విషయమై నిర్ణయం తీసుకోలేదని ఆయన సన్నిహితులు అంటున్నారు.

శ్రీదేవి చిన్న కూతురు, జాన్వీ కపూర్‌ చెల్లి అయిన ఖుషి కపూర్‌ ను మోక్షజ్ఞ కి జోడీగా నటింపజేసే అవకాశాలు ఉన్నాయని ఇటీవల ప్రచారం జరిగింది. కానీ ఇప్పటి వరకు ఆ దిశగా చర్చలు జరగలేదని సమాచారం అందుతోంది. బాలీవుడ్‌ లో ఇప్పటికే రెండు మూడు సినిమాలు చేసి మంచి విజయాలను సొంతం చేసుకుని, గుర్తింపు దక్కించుకున్న హీరోయిన్‌ కోసం చూస్తున్నారట. అలాంటి హీరోయిన్‌ ఎవరు అనేది అందరిలో ఆసక్తిని రేకెత్తిస్తోంది. మోక్షజ్ఞ తాజా లుక్‌ లో చాలా చిన్న కుర్రాడిగా అనిపిస్తున్నాడు. కనుక హీరోయిన్‌ ను మోక్షూ కి తగ్గట్లుగా ఎంపిక చేయడం అనేది పెద్ద టాస్క్ గా మారింది. దర్శకుడు ప్రశాంత్‌ వర్మ తన కథల కోసం నటీ నటులను సరిగ్గా ఎంపిక చేసుకుంటాడు అనే టాక్ ఉంది. కనుక ఈ సినిమా కోసం అతడు సరైన హీరోయిన్‌ ను ఎంపిక చేస్తాడని ఫ్యాన్స్ భావిస్తున్నారు.

బాలకృష్ణ గతంలో ఆదిత్య 369 సీక్వెల్‌ లో తాను, మోక్షూ కలిసి నటిస్తామని ప్రకటించాడు. కానీ ఇప్పట్లో ఆ సీక్వెల్‌ ఉండే అవకాశం లేదు. మోక్షజ్ఞ మొదటి సినిమా సోలో హీరోగా ప్రశాంత్‌ వర్మ దర్శకత్వంలో రాబోతుంది. ఇప్పటికే ఆ విషయమై ఫిక్స్ అయింది. అన్నీ అనుకున్నట్లుగా జరిగితే 2025 లో తెలుగు ప్రేక్షకుల ముందుకే కాకుండా పాన్‌ ఇండియా సినీ ప్రేక్షకుల ముందుకు మోక్షజ్ఞ ఎంట్రీ ఇచ్చే అవకాశాలు ఉన్నాయి. ఎన్టీఆర్‌ స్థాయి ఇమేజ్ ను, స్టార్‌ డమ్‌ ను మోక్షజ్ఞ దక్కించుకోవడం ఖాయం అని, తాతకు తగ్గ మనవడు, తండ్రి కి తగ్గ తనయుడు, అన్న కు తగ్గ తమ్ముడు గా మోక్షజ్ఞ పేరు తెచ్చుకుంటాడని ఫ్యాన్స్ చాలా నమ్మకంతో ఉన్నారు.