జానీ మాస్టర్‌ ఫ్యూచర్‌ ఏంటో.. జైలా? బెయిలా?

టాలీవుడ్‌ ప్రముఖ సినిమాటోగ్రాఫర్ జానీ మాస్టర్ అత్యాచార ఆరోపణలు ఎదుర్కొంటున్న విషయం తెల్సిందే. ఆయన మాజీ శిష్యురాలు ఇచ్చిన ఫిర్యాదు మేరకు నార్సింగి పోలీసులు పోక్సో కేసును బుక్ చేశారు. జానీ మాస్టర్‌ ను పోలీసులు ఇప్పటికే అరెస్ట్‌ చేసి కోర్టులో హాజరు పరచడం జరిగింది. కోర్టు అనుమతితో పోలీసులు నాలుగు రోజులు కస్టడీలోకి తీసుకుని విచారణ సాగించారు. విచారణలో భాగంగా జానీ మాస్టర్ పలు విషయాలపై పోలీసులు అడిగిన ప్రశ్నలకు సమాధానాలు చెప్పాడట. నాలుగు రోజుల కస్టడీ ముగియడంతో విచారణ పూర్తి అయినట్లేనా అనే చర్చ మొదలైంది.

పోలీసులు జానీ మాస్టర్‌ను మరోసారి కస్టడీకి కోరే అవకాశాలు ఉన్నాయా? ఆయన నుంచి పోలీసులు కావాల్సిన సమాచారం పూర్తిగా పొందారా అనేది తెలియాల్సి ఉంది. మరో వైపు జానీ మాస్టర్ రంగారెడ్డి జిల్లా కోర్టులో బెయిల్‌ పిటీషన్ వేయడం జరిగింది. బెయిల్‌ పిటీషన్‌కు సంబంధించిన విచారణ సోమవారం జరగబోతుంది. బెయిల్‌‌కి సంబంధించి ప్రస్తుతం అందరిలో ఆసక్తి నెలకొంది. రంగారెడ్డి జిల్లా కోర్టు బెయిల్‌ పిటీషన్‌‌ను కొట్టి వేసినా వెంటనే జానీ మాస్టర్‌ పై కోర్టుకు వెళ్లే అవకాశాలు ఉన్నాయి. జానీ మాస్టర్‌ అరెస్ట్‌ అయింది పోక్సో చట్టం కింద కనుక బెయిల్‌ అంత ఈజీగా రాకపోవచ్చు అని న్యాయ నిపుణులు చెబుతున్నారు.

గతంలో నమోదు అయిన పోక్సో కేసులను పరిశీలిస్తే బెయిల్‌ వచ్చినా చాలా ఆలస్యంగా వచ్చింది. కనుక జానీ మాస్టర్ కి బెయిల్‌ రాదు అని చెప్పలేం.. కానీ చాలా ఆలస్యంగా బెయిల్‌ వచ్చే అవకాశాలు ఉన్నాయి అనే అభిప్రాయం వ్యక్తం అవుతోంది. జిల్లా కోర్టులో బెయిల్‌ మంజూరుకు ఛాన్స్ తక్కువ ఉందనే అభిప్రాయాన్ని కొందరు న్యాయ నిపుణులు వ్యక్తం చేస్తున్నారు. విచారణ ఇంకా ఆరంభ దశలోనే ఉంది. కనుక ఈ సమయంలో జానీ మాస్టర్‌ ను విడుదల చేస్తే కచ్చితంగా సాక్ష్యులను ప్రభావితం చేసే అవకాశాలు ఉన్నాయి అనే అభిప్రాయాన్ని కొందరు వ్యక్తం చేస్తున్నారు.

జానీ మాస్టర్ టాలీవుడ్ తో పాటు, కోలీవుడ్‌, బాలీవుడ్‌ లోనూ పదుల కొద్ది సినిమా పాటలకు కొరియోగ్రఫీ అందించారు. కొరియోగ్రాఫర్‌‌గా జాతీయ స్థాయి గుర్తింపు దక్కించుకున్న ఇతడు కొన్ని సంవత్సరాల క్రితం తన శిష్యురాలిపై ముంబైలో ఒక హోటల్‌లో అఘాయిత్యానికి పాల్పడ్డాడు. జానీ మాస్టర్ భార్య పైనా ఈ కేసులో పోలీసులకు ఫిర్యాదు అందింది. జానీ మాస్టర్ విచారణ పూర్తి అయిన నేపథ్యంలో రేపు లేదా త్వరలోనే జానీ మాస్టర్‌ భార్యను పోలీసులు విచారణ చేసే అవకాశాలు ఉన్నాయని తెలుస్తోంది.