సిరిసిల్లలో ఉద్రిక్తత.. పోలీసుల లాఠీఛార్జ్‌తో గాయాలు

సిరిసిల్లలోని ఎమ్మెల్యే కేటీఆర్ క్యాంపు కార్యాలయం వద్ద సోమవారం తీవ్ర ఉద్రిక్తత చోటుచేసుకుంది. ప్రొటోకాల్ ప్రకారం ఎమ్మెల్యే క్యాంపు ఆఫీసులో ముఖ్యమంత్రి రేవంత్ రెడ్డి ఫొటో ఉంచాలని కాంగ్రెస్ నాయకులు డిమాండ్ చేశారు. ఈ క్రమంలో సీఎం ఫొటోతో కార్యాలయాన్ని ముట్టడించేందుకు కాంగ్రెస్ కార్యకర్తలు ప్రయత్నించగా, బీఆర్ఎస్ కార్యకర్తలు వారిని అడ్డుకున్నారు.

ఈ పరిణామం ఇరు వర్గాల మధ్య తీవ్ర వాగ్వాదానికి దారితీసింది. పరిస్థితి ఉద్రిక్తంగా మారడంతో ఇరు పక్షాల కార్యకర్తల మధ్య తోపులాట జరిగింది. ఉద్రిక్తతను అదుపు చేసేందుకు పోలీసులు లాఠీఛార్జ్‌కు దిగారు. ఈ ఘటనలో పలువురు కార్యకర్తలకు గాయాలయ్యాయి. ప్రస్తుతం పరిస్థితి నియంత్రణలో ఉన్నప్పటికీ, సిరిసిల్లలో రాజకీయ వాతావరణం ఉద్విగ్నంగా కొనసాగుతోంది.