పాకిస్థాన్‌పై భారత్ మరో దెబ్బ: దిగుమతులపై పూర్తి నిషేధం

పాకిస్థాన్ నుంచి ప్రత్యక్ష మరియు పరోక్ష దిగుమతులపై భారత కేంద్ర ప్రభుత్వం కఠిన నిర్ణయం తీసుకుంది. ఈ మేరకు దిగుమతులను పూర్తిగా నిషేధిస్తూ ఉత్తర్వులు జారీ చేసింది. జాతీయ భద్రత మరియు పబ్లిక్ పాలసీ పరిరక్షణ దృష్ట్యా ఈ చర్య తీసుకున్నట్లు ప్రభుత్వం స్పష్టం చేసింది.

ఈ నిషేధం తక్షణమే అమల్లోకి వస్తుందని, తదుపరి ఉత్తర్వులు వచ్చే వరకు పాకిస్థాన్ నుంచి ఎలాంటి దిగుమతులకూ అనుమతి ఉండదని ప్రభుత్వం తెలిపింది. ఒకవేళ ఏదైనా మినహాయింపు అవసరమైతే, కేంద్ర ప్రభుత్వం నుంచి ప్రత్యేక అనుమతి తప్పనిసరని వెల్లడించింది.

ఈ నిర్ణయం పాకిస్థాన్ ఆర్థిక వ్యవస్థపై తీవ్ర ప్రభావం చూపనుందని ఆర్థిక నిపుణులు అభిప్రాయపడుతున్నారు. భారత్‌తో వాణిజ్య సంబంధాలు నిలిచిపోవడంతో పాకిస్థాన్ భారీ నష్టాలను ఎదుర్కొనే అవకాశం ఉందని వారు హెచ్చరిస్తున్నారు. ఈ చర్య ద్వైపాక్షిక సంబంధాలపై కూడా మరింత ఒత్తిడిని పెంచే అవకాశం ఉందని విశ్లేషకులు పేర్కొంటున్నారు.

పాకిస్థాన్ నుంచి భారత్‌కు జరిగే దిగుమతుల్లో పలు రకాల వస్తువులు ఉంటాయి. అయితే, ఈ నిషేధంతో ఆ వాణిజ్య కార్యకలాపాలు పూర్తిగా స్తంభించనున్నాయి. ఈ నేపథ్యంలో, భారత్ తీసుకున్న ఈ నిర్ణయం రాజకీయ, ఆర్థిక వర్గాల్లో తీవ్ర చర్చనీయాంశంగా మారింది.