నా ప్రశ్నలకు EC సమాధానమేది?: రాహుల్

కాంగ్రెస్ అగ్రనేత రాహుల్ గాంధీ ఎన్నికల సంఘం (ఈసీ)పై తీవ్ర ఆరోపణలు చేశారు. మహారాష్ట్రతో సహా వివిధ రాష్ట్రాల అసెంబ్లీ, లోక్‌సభ ఎన్నికల్లో మ్యాచ్ ఫిక్సింగ్ జరిగిందని, ఈ విషయంలో తాను లేవనెత్తిన ప్రశ్నలకు ఈసీ సమాధానం ఇవ్వకుండా దాటవేస్తోందని ఆయన ఆరోపించారు. ఎన్నికల పారదర్శకత కోసం మిషన్-రీడబుల్, డిజిటల్ ఓటరు జాబితాలను ప్రచురించాలని, అలాగే మహారాష్ట్రలోని పోలింగ్ బూత్‌ల సీసీ ఫుటేజ్‌ను, ముఖ్యంగా సాయంత్రం 5 గంటల తర్వాత రికార్డైన విజువల్స్‌ను విడుదల చేయాలని రాహుల్ గాంధీ డిమాండ్ చేశారు. ఈసీ ఈ చర్యలు తీసుకుంటే ప్రజల్లో ఎన్నికల సంఘంపై విశ్వసనీయత పెరుగుతుందని ఆయన అన్నారు.

ఈసీ మాత్రం రాహుల్ గాంధీ ఆరోపణలను తిరస్కరిస్తూ, వాటిని నిరాధారమైనవిగా అభివర్ణించింది. రాహుల్ లేవనెత్తిన ప్రశ్నలకు సమాధానం ఇవ్వకుండా, సంతకం లేని నోట్‌లతో సమాధానాలు ఇస్తూ సందిగ్ధంగా వ్యవహరిస్తోందని కాంగ్రెస్ నేతలు విమర్శించారు. మహారాష్ట్ర ఎన్నికల్లో అక్రమాలు జరిగాయని రాహుల్ చేసిన ఆరోపణలపై ఈసీ స్పష్టమైన జవాబు ఇవ్వాలని, లేకపోతే దాని విశ్వసనీయత ప్రశ్నార్థకంగా మారుతుందని వారు హెచ్చరించారు. ఈసీ వెబ్‌సైట్‌లో అందుబాటులో ఉన్న సమాచారంతోనే తమ ఆరోపణలకు సమాధానం ఇవ్వాలని కాంగ్రెస్ నేతలు కోరుతున్నారు.