తెలంగాణలో 1.59 లక్షల రేషన్ కార్డులపై కేంద్రం దృష్టి: రద్దు అవకాశం

తెలంగాణ రాష్ట్రంలో గత ఆరు నెలలుగా రేషన్ తీసుకోని 1.59 లక్షల రేషన్ కార్డులపై కేంద్ర ప్రభుత్వం దృష్టి సారించింది. ఈ కార్డులపై విచారణ జరపాలని పౌర సరఫరాల శాఖ అధికారులను కేంద్రం ఆదేశించింది. ఇప్పటివరకు 80% కార్డులను పరిశీలించిన అధికారులు, వీటిలో సుమారు 30% కార్డులు అర్హత లేనివిగా గుర్తించారు.

పరిశీలనలో బయటపడిన లోపాల్లో ఇతర రాష్ట్రాల్లో కార్డులు కలిగి ఉండటం, కార్డు హోల్డర్లు మరణించడం, డూప్లికేట్ ఆధార్ వివరాలతో రేషన్ కార్డులు పొందడం వంటివి ఉన్నట్లు అధికారులు తెలిపారు. ఈ లోపాల ఆధారంగా చాలా కార్డులు రద్దయ్యే అవకాశం ఉందని వారు స్పష్టం చేశారు. ఈ చర్యల ద్వారా రేషన్ వ్యవస్థలో పారదర్శకతను పెంచడం, అర్హులైన వారికే సబ్సిడీ సౌకర్యాలు అందేలా చేయడమే లక్ష్యంగా కేంద్రం ఈ విచారణను చేపట్టినట్లు తెలుస్తోంది.